جداول المقاسات

 شرح طريقة عمل جاكيت كروشيه بالخطوات 

بسم الله الرحمن الرحيم 

ازيكم يا حبايبي عاملين ايه

 موديل النهارده عباره عن جاكيت كروشيه شتوي سهل 

مناسب للاطفال ومناسب للكبار 

اشتغلنا مع بعض قبل كده الجيبه والنهارده هنشتغل الجاكيت علشان يكون الطقم كامل 

تقدري تنفذيه بكل سهوله ودي صفحه الجيبه فيها الشرح بالتفاصيل خطوه بخطوه

صفحه الجيبه 

ننتقل للجاكيت مناسب جدا للمبتدئين خطواته سهله الغرزه بسيطه

 حتى لو كنت لسه مبتدئه في الكروشيه هيكون سهل عليك تنفذي 

ما هي مواصفات الجاكيت والخامات؟

 تم تنفيذ الموديل لسن من سنه لسنتين مع امكانيه تعديل المقاس بكل سهوله ليناسب اي سن واي مقاس 

نوع الخيط المستخدم مدام تريكو

 مواصفات الخيط خيط صوف تركي متوسط السمك البكره 100 جرام 300 متر

 اشتغلت بابره مقاس اربعه 

كمية الخيط المستخدمه 180 جرام تقريبا

تقدري تغيري نوعيه الخيط لاي نوع مفضل عندك وابره مناسبه لنوعيه الخيط 

ما هي المقاسات المطلوبه للجاكيت الكروشيه ؟

اول مقاس بنحتاجه بيكون مقاس محيط دوران الرقبه

 القطعه بتاعتنا مفتوحه وفيها زراير فبنشتغل على دوران الرقبه

 لكن لو كان الموديل مقفول بنشتغل على دوران الراس 

المقاس رقم 2 هو مقاس محيط دوران الذراع 

المقاس رقم 3 بيكون مقاس محيط دوران الصدر 

المقاس رقم اربعه الطول الكلي للجاكيت وده متروك لك 

المقاس رقم خمسه بيكون طول الكم الطويل 

ملحوظه في حاله وجود الطفله الافضل ناخذ المقاسات منها مباشره لكن لو الطفله مش موجوده بنلجا لجدول المقاسات 

جميع جداول المقاسات موجوده في اللينك ده

لينك صفحه الجداول 

بدايه العمل

 في بدايه العمل بناخذ مقاس محيط دوران الرقبه من جدول المقاسات وبنضيف عليه 5 سم

 وبنشتغل سلسله بالطول المطلوب 

بنراعي في السلسله انها تكون من مضاعفات العدد 3 ناقص1 

بشتغل الموديل بتاعي لسن من سنه لسنتين مقاس محيط دوران الرقبه 25 سم 

ضفت عليه كمان 5 سم واشتغلت سلسله بطول 30 سم 

مع مراعاه ان تكون من مضاعفات العدد 3 طلعت معايا 60 غرزه في النهايه طرحت غرزه واحده 

علشان اظبط السطر اصبحت سلسله البدايه 59 غرزه 

السطر الاول 

برتفع سلسله واحده وبتكون مجرد ارتفاع وبشتغل على كل غرزه تقابلني غرزه حشو لنهايه السطر

 السطر رقم اثنين

 برتفع سلسله وبتكون مجرد ارتفاع وبشتغل على اول غرزه غرزه حشو

 الغرزه رقم 2 حشو 

الغرزه رقم 3 تزايد اثنين غرزه حشو 

وبنكرر غرزه حشو الغرزه اللي بعدها حشو الغرزه رقم 3 تزايد اثنين غرزه حشو

 وبنستمر على نفس النمط لنهايه السطر

 السطر الثالث

بنبدا في تغيير اللون بوصل اللون الاخضر في اول غرزه برتفع سلسلتين وبعتبرهم باول عمود

 بتخطى غرزه وبنتقل للغرزه رقم 3 وبشتغل فيها حرف في من عمود سلسله عمود 

ثم اتخطى غرزتين وانتقل للغرزه الثالثه واشتغل حرف في من عمود سلسله عمود 

واكرر اتخطى غرزتين وانتقل للغرزه الثالثه واشتغل عمود سلسله عمود 

وبستمر على نفس النمط لنهايه السطر

 وبينتهي السطر بتاعي بغرزه عمود في اخر غرزه عندي في نهايه السطر 

السطر رقم اربعه

 بنبدا في تغيير اللون وبنشتغل باللون الموف

بوصل الخيط في اول غرزه عندي في بدايه السطر 

برتفع سلسلتين وبعتبرهم بعمود وبشتغل كمان سلسله يبقى انا كده معايا عمود وسلسله 

وبروح لاول حرف في وبشتغل فيه خمسه عمود 

بطول حلقه اخر عمود وبخرج بالابره وبنتقل لاول عمود من الخمسه بدخل في الحلقه بتاعته وبسحب الحلقه اللي طولتها وبكده بكون كونت غرزه الفشاره

 ثم سلسلتين وانتقل لحرف الفي واشتغل غرزه فيشاره

 ثم سلسلتين وانتقل لحرف الفي واشتغل غرزه فيشاره 

وبكرر على نفس النمط لنهايه السطر 

وبينتهي السطر بتاعي بغرزه عمود زي ما بدا بغرزه عمود

السطر الخامس

 بعد ذلك بنوصل اللون الاساسي علشان نبدا السطر رقم خمسه

 بدايه السطر رقم خمسه بوصل اللون الاساسي في اول غرزه 

برتفع سلسله وبتحسب مجرد ارتفاع وبشتغل في اول عمود غرزه حشو

 بعد اول عمود بيقابلني فراغ قبل اول غرزه فشاره بشتغل فيه غرزه حشو

 في غرزه الفشاره بشتغل غرزه حشو

 في الفراغ ما بين غرز الفشاره بشتغل اثنين غرزه حشو

 وبكمل على النمط بتاعي في غرزه الفشاره بشتغل غرزه حشو وفي الفراغ ما بين غرز الفشاره بشتغل اثنين حشو وبينتهي السطر بتاعي بغرزه حشو وفي اخر عمود

السطر السادس

بدايه السطر  برتفع سلسلتين وبيحسبوا باول عمود

 الغرزه رقم 2 عمود 

الغرزه رقم 3 عمود 

الغرزه رقم اربعه تزايد اثنين عمود 

وبنكرر ثلاث غرز على كل غرزه عمود والغرزه رقم اربعه تزايد اثنين عمود 

وبستمر على نفس النمط لنهايه السطر

 السطر السابع

بدون تزايد بشتغل على كل غرزه تقابلني غرزه عمود لنهايه السطر 

السطر الثامن

برتفع سلسلتين وبيحسبوا باول عمود

 الغرزه رقم 2 عمود

 الغرزه رقم 3 عمود 

الغرزه رقم اربعه عمود 

والغرزه رقم خمسه تزايد اثنين عمود 

وبنكرر اربع غرز على كل غرزه عمود والغرزه رقم خمسه تزايد اثنين عمود 

السطر التاسع 

 بدون تزايد بشتغل على كل غرزه تقابلني غرزه عمود

 وبستمر على نفس النمط لحين وصول القطعه للمقاس المطلوب

ما هي طريقه اخذ مقاسات الصدر الدائري لجاكيت كروشيه؟

للتاكد من وصول القطعه للمقاس المطلوب بنبدا في تقسيم الصدر ووضع العلامات

ونبدا نقيس اول خطوه بنتقل لاخر سطر من سطور الصدر وببدا اعد الغرز

وبنبدا نقسم نراعي في تقسيمه الصدر ان عدد الغرز المخصصه للكم تكون اقل من عدد غرز الظهر او الامام

بعد تقسيمه الصدر ووضع العلامات بنبدا نقيس

اول مقاس بنحتاجه هو مقاس محيط دوران الذراع

بنتقل لجزئيه الكم وبقيس من العلامه للعلامه يجب ان تصل لمقاس محيط دوران الذراع

ثاني مقاس بنحتاجه هو مقاس محيط دوران الصدر

بناخذ المقاس من الجدول وبنقسمه على اثنين

وبنروح على جزئيه الضهر وبنقيس من العلامه العلامه

يجب ان تصل لمقاس نص محيط دوران الصدر

بعد التاكد من وصول القطعه للمقاس المطلوب بنبدا في التقفيل

 بدايه سطر التقفيل 

برتفع سلسله وبتحصل مجرد ارتفاع وبشتغل على كل غرزه تقابلني غرزه حشو لحين الوصول لاول علامه 

بعد الوصول لاول علامه بشيل العلامه وبشتغل في الغرزه غرزه حشو

 ثم سلسلتين ممكن نزود عدد السلاسل ثم نتخطى جزئيه الكم وبننتقل للعلامه الثانيه 

وبنشتغل في الغرزه اللي فيها العلامه غرزه حشو

 ثم نستمر على كل غرزه تقابلنا غرزه حشو لحين الوصول للعلامه

 بنشيل العلامه وبنشتغل في الغرزه غرزه حشو ثم سلسلتين

 وبنتخطى جزئيه الكم وبننتقل للغرزه اللي فيها العلامه ونشتغل فيها غرزه حشو 

وبنكمل باقي السطر بغرز الحشو لنهايه السطر وده بيكون سطر التقفيل

طريقة الشغل بغرزة الكلاستر

 وبعد ذلك بننتقل للغرزه الاساسيه في الجاكيت 

بدايه السطر بارتفاع ثلاث سلاسل وبيحسبوا معايا باول عمود 

بتخطى غرزه وبنتقل للغرزه رقم 2 وبشتغل غرزه كلاستر سلسلتين غرزة كلاستر

ثم ااتخطى غرزتين وانتقل للغرزه الثالثه واشتغل غرزه كلاستر سلسلتين غرزة كلاستر

 ثم اتخطى غرزتين وانتقل للغرزه الثالثه واشتغل غرزه كلاستر سلسلتين غرزه كلاستر

 وبستمر لنهايه السطر وبينتهي السطر بتاعي بغرزه عمود في اخر غرزه

 بدايه السطر الجديد 

برتفع ثلاث سلاسل وبيحصبوا معايا باول عمود وبلف القطعه بتاعتي على الجهه الاخرى

 بنتقل لاول غرزتين كلاستر بدخل تحت السلسلتين وبشتغل غرزه كلاستر سلسلتين غرزه كلاستر

 ثم انتقل لغرزتين الكلاستر واشتغل تحت السلسلتين غرزه كلاستر سلسلتين غرزة كلاستر

وبكمل على نفس النمط لنهايه السطر وبينتهي السطر بتاعي بغرزه عمود في اخر غرزه وبنستمر في تكرار السطر رقم 2 لحين الوصول للطول المطلوب

طريقة عمل كورنيش للجاكيت الكروشيه بغرزة زهرة التوليب

 بعد وصول القطعه للطول المطلوب ناقص تقريبا 4 سم 

بنبدا في تغيير اللون وبندخل اللون الاخضر بوصل اللون في اول غرزه وببدا اعمل كورنيش الجاكيت 

طريقه عمل كورنيش الجاكيت 

برتفع ثلاث سلاسل وبعتبرهم بعمود وبنتقل لاول غرزتين كلاستر

 بدخل تحت السلسلتين وبشتغل حرف في من عمود سلسلتين عمود 

ثم انتقل لغرزتين الكلاستر واشتغل حرف في من عمود سلسلتين عمود 

وبكمل على نفس النمط لنهايه السطر 

وبينتهي السطر بعمود في اخر غرزه

 بعد ذلك بغير اللون وبدخل اللون الموف 

بوصل اللون في اول غرزه وبرتفع ثلاث سلاسل وبعتبرهم بعمود

 وبشتغل كمان سلسله وبنتقل لاول حرف في واشتغل فيه غرزه فيشاره

 ثم سلسلتين وانتقل لحرف الفي واشتغل غرزه فيشاره

 ثم ثلاث سلاسل 

وبكرر بنتقل لحرف الفي وبشتغل غرزه فشاره ثم سلسلتين

 انتقل حرف الفي واشتغل غرزه فشاره ثم ثلاث سلاسل 

وبستمر على نفس النمط لنهايه السطر وبينتهي السطر بتاعي بغرزه عمود في اخر غرزه 

بعد ذلك بنوصل اللون الاساسي

برتفع ثلاث سلاسل وبيحسبوا باول عمود وبنتقل لاول غرزه فشاره واشتغل فيها غرزه حشو

 في الفراغ ما بين غرز الفشاره بشتغل ست عمود

 فوق غرزه الفشاره بشتغل غرزه حشو

 في الفراغ بين غرز الفشاره بشتغل سته عمود 

وبكمل على نفس النمط لنهايه السطر وبينتهي السطر بغرزه عمود في اخر غرزه في السطر

ما هي طريقه عمل الكم الصحيح للجاكيت الكروشيه

ننتقل لفتحه الكم نوصل الخيط في السلاسل اللي اشتغلناها عند حرده الابط

 برتفع سلسله وبتحسب مجرد ارتفاع وببدا اشتغل على كل غرزه تقابلني غرزه حشو

 مع مراعاه ان يكون عدد السلاسل من مضاعفات العدد 3 

من الممكن ان نشتغل تزايد او تناقص حتى نوصل للعدد المظبوط ويكون من مضاعفات العدد 3

 بينتهي السطر بتاعي بغرزه منزلقه في اول غرزه حشو

 السطر رقم 2 

من سطور الكم برتفع سلسلتين وبيحسبوا معايا بعمود ولم يكتمل 

في نفس الغرزه بشتغل كمان عمود وبكده بنكون كونا اول غرزه كلاستر

 ثم سلسلتين وبشتغل غرزه كلاستر كمان في نفس الغرزه 

اتخطى غرزتين وانتقل للغرزه الثالثه واشتغل غرزه كلاستر سلسلتين غرزه كلاستر

 وبستمر على نفس النمط لنهايه السطر 

وبنهي السطر في اول غرزه كلاستر

 بنتقل لاول فراغ يقابلني ما بين اول غرزتين كلاستر بمنزلقه 

برتفع سلسلتين وبيحسبوا معي باول عمود ولم يكتمل

 وبلف القطعه على الجهه الاخرى

 ملحوظه

سطور الكم بنشتغل سطر على الوش وسطر على الظهر

 في نفس الفراغ بشتغل كمان عمود وبكده بكون كونت اول غرزه كلاستر

 ثم سلسلتين وفي نفس الفراغ كمان غرزه كلاستر

 ثم انتقل لغرزتين الكلاستر اللي بعدهم واشتغل تحت السلسلتين غرزه كلاستر سلسلتين غرزه كلاستر

 وبكمل على نفس النمط وهنفضل نكرر في السطور سطر على الوش وسطر على الظهر 

لحين وصول الكم للطول المطلوب ناقص 4 سم 

طول الكم الطويل موجود في جدول المقاسات طبعا على حسب السن

 ما بين اول غرزتين كلاستر بوصل الخيط وبرتفع ثلاث سلاسل وبحسبهم باول عمود

 وبشتغل كمان سلسلتين ثم عمود كمان في نفس الفراغ 

وبكده بكون كونت اول حرف في 

بنتقل للفراغ اللي بعده ما بين غرزتين كلاستر تحت السلسلتين بشتغل حرف في من عمود سلسلتين عمود 

وبكمل على نفس النمط وبينتهي السطر بتاعي بغرزه منزلقه في ثالث سلسله ارتفاع 

ببدا اوصل اللون الموف

 بدخل في الفراغ في اول حرف في وبوصل اللون الموف بارتفاع سلسلتين وبيحسبوا معي باول عمود 

وبشتغل كمان اربعه عمود وبكده بكون اشتغلت خمسه عمود في اول حرف في وبكون اول غرزه فيشاره

 ثم سلسلتين وانتقل لحرف الفي اللي بعده واشتغل غرزه فيشاره ثم سلسلتين حرف الفي اللي بعده غرزات فشاره ثم سلسلتين وبكمل على نفس النمط لنهايه السطر وبينتهي السطر بتاعي بغرزه منزلقه في اول غرزه فشاره

بعد الوصول للطول المطلوب بغير اللون وببدأ ادخل اللون الاخضر

 

بنبدا نرجع للون الاساسي بوصل اللون في اول غرزه فيشاره بارتفاع سلسلتين وبيحسبه باول عمود

 في الفراغ ما بين غرز الفشاره بشتغل اثنين عمود 

في غرزه الفيشاره عمود في الفراغ ما بين غرز الفشاره اثنين عمود 

وبكمل على نفس النمط لنهايه السطر وبينتهي السطر بمنزلقه في ثاني سلسله ارتفاع 

بدايه السطر الجديد بارتفاع سلسلتين وبيحسبوا باول عمود

العمود رقم 2 عمود امامي العمود رقم 3 عمود خلفي العمود رقم4 عمود امامي العمود رقم 5 عمود خلفي 

وبكمل على نفس النمط لنهايه السطر

 تقدري تكرري السطر ده اي عدد من المرات لحين وصول اسورة الكم للمقاس المطلوب 

وبكده بنكون شرحنا مع بعض الجاكيت بالتفصيل خطوه بخطوه 

لمشاهده طريقه العمل عملي تابعوا الفيديو التعليمي