طريقة عمل فستان كروشيه سهل مناسب للشتاء والربيع
بسم الله الرحمن الرحيم
ازيكم يا حبايبي عاملين ايه
النهارده هنشتغل مع بعض موديل بسيط وجميل سهل جدا, ومناسب للمبتدئين
عباره عن فستان كروشيه للاطفال, مناسب لفصل الشتاء ومناسب كمان لفصل الربيع
ممكن كمان لو اشتغلتي بخيط قطن يكون مناسب لفصل الصيف
يعني تقدري تنفذيه في اي وقت من السنه صيف او شتاء
بيبدا الموديل بتاعنا من فوق وبنشتغل لغايه ما نوصل للطول المناسب .المقاسات في الموديل بتاعنا مختلفه شويه هنشتغلوا مع بعض بالتفصيل خطوه بخطوه, وطبعا هسيب لكم جدول المقاسات لسهوله العمل
وكمان اللي حابب يتابع الشغل عملي هسيب لكم لينك الفيديو في نهايه الصفحه
مواصفات الفستان والخامات المستخدمه
تم تنفيذ القطعه لسن من سنه لسنتين ,مع امكانيه تغيير المقاس بكل سهوله ليناسب اي سن واي مقاس
الخامات المستخدمه استخدمت 200 جرام خيط
نوع الخيط خيط صوف تركي ستوك مقاس
الابره اربعه ونص
جروب الخيط
طريقه اخذ المقاسات
اول مقاس بنحتاجه بيكون مقاس محيط دوران الذراع
ثاني مقاس بيكون مقاس محيط دوران الصدر
المقاس الثالث وده بيكون الطول الكلي للفستان
تنفيذ الفستان
بنبدا نشتغل سلاسل بعرض 14 سم والمقاس ده مناسب لسن من سنه لسنتين
لو بتنفذي لاكبر من كده هتزودي طبعا ,كل ما هتزودي سنه هتزودي من 1سم ل 2 سم
اشتغلت سلسله بمقاس 14 سم طلعت معايا 25 سلسله ,اختلاف نوعيه الخيط واختلاف مقاس الابره ممكن يخلي عدد السلاسل مختلف
السطر الاول
برتفع سلسلتين وبيحسبوا باول عمود وبشتغل على كل غرزه تقابلني غرزه عمود لنهايه السطر
بدايه السطر رقم 2
برتفع سلسلتين وبعتبرهم بعمود
الغرزه رقم 2 عمود خلفي
الغرزه رقم 3 عمود امامي
الغرزه رقم اربعه عمود خلفي الغرزه
رقم خمسه عمود امامي
وبنستمر غرزه عمود خلفي وغرزه عمود امامي لنهايه السطر
السطر رقم 3
برتفع سلسلتين وبلف القطعه بتاعتي على الجهه الثانيه, سلاسل الارتفاع تحسب اول عمود
العمود رقم 2 بنبص للسطر اللي فات لو ظاهر قدامنا عمود خلفي بنشتغل عليه عمود خلفي
لو ظاهر قدامنا عمود امامي بنشتغل عليه عمود امامي, وبنستمر فوق العمود الخلفي عمود خلفي ,وفوق العمود الامامي عمود امامي ,لنهايه السطر وبينتهي السطر بتاعي بعمود عادي
وكده بينتهوا اول ثلاث سطور هنبدا دلوقتي في السطر رقم اربعه وده هنشتغله بطريقه
بدايه السطر رقم اربعه
برتفع سلسلتين وبيحسبوا معايا باول عمود ,الغرزه رقم 2 عمود خلفي
الغرزه رقم 3 عمود امامي ,الغرزه رقم اربعه عمود خلفي ,الغرزه رقم خمسه عمود امامي ,والغرزه رقم 6 عمود خلفي
وبكده خلصنا اول ست غرز في السطر اشتغلناهم بغرزه العمود الامامي والعمود الخلفي
دلوقتي هنشتغل على كل غرزه تقابلنا غرزه نص عمود ,بمعنى الغرزه رقم 7 نص عمود ,والغرزه رقم 8 نص عمود, والغرزه رقم 9 نص عمود ,وبنستمر على نفس النمط لغايه ما نوصل لاخر ست غرز في السطر بنبدا نشتغلهم بغرزه العمود الامامي والعمود الخلفي
يعني السطر بيبدا بسته غرز من غرزه العمود الامامي والخلفي
وبينتهي بست غرز من غرزه العمود الامامي والخلفي
وفي النص غرز نص عمود
بالنسبه للعدد اللي عندي بدايه السطر ست غرز ونهايته ست غرز وفي النص 13غرزة نص عامود
السطر رقم 2
في بدايه السطر برتفع سلسلتين وبيحسبوا معايا باول عمود
وبكمل على نفس النمط ست غرز من غرزه العمود الامامي والخلفي
بعد الانتهاء من غرز العمود الامامي والخلفي بدخل ما بين الغرز وبعمل غرزه نص عمود زياده
وده التزايد وبعدين بنتقل لغرز النص عمود اللي اشتغلتها في السطر اللي فات وبشتغل على كل غرزه تقابلني غرزه نص عمود ,لحين الوصول لاخر ست غرز في السطر قبل ما ابدا في غرز العمود الامامي والخلفي اللي في نهايه السطر بعمل في الفراغ ما بين الغرز غرزه نص عمود زياده
بمعنى ان بنشتغل تزايد قبل غرز النص عمود وبعد غرز النص عمود وبينتهي السطر بتاعي بست غرز من غرزه العمود الامامي والخلفي
( وهو ده السطر اللي هيفضل يتكرر معانا )
بدايه السطر الجديد برتفع سلسلتين وبيحسبوا معايا باول عمود
وبكمل ست غرز من غرزه العمود الامامي والخلفي
قبل ما ابدا في غرز النص عمود بشتغل غرزه نص عمود زياده ما بين الغرز في الفراغ ,وبعدين بشتغل على كل غرزه عندي غرزه نص عمود لحين الوصول لمجموعه الست غرز اللي في نهايه السطر, قبل ما ابدا في الست غرز العمود الامامي والخلفي بشتغل غرزه نص عمود تزايد
وبستمر على نفس النمط لحين وصول القطعه للمقاس المطلوب
المقاسات المطلوبه
يجب ان يصل جزئيه الكم لنص مقاس محيط دوران الذراع
ويجب ان تصل منطقه الصدر لنص مقاس محيط دوران الصدر
بعد التاكد من وصول القطعه للمقاسات المطلوبه بنفذ قطعه تانيه بنفس الطريقه
وبكده بيكون عملنا جزئيه الوش وجزئيه الظهر
بنبدا بعد ذلك في تشبيك القطعتين وممكن تشوفوا طريقه التشبيك عملي في الفيديو التعليمي
بعد تشبيك القطعتين بنبدا نشتغل على كل غرزه تقابلنا غرزه نص عمود
وبدايه السطر بيبدا بعمود امامي وفي الجهه الثانيه عند حرده الكم بيكون برده في عمود امامي
يبقى عندنا اثنين عمود امامي, عمود امامي في الجنب اليمين ,وعمود امامي في الجنب الشمال, وبقيه غرز السطر وغرز نص عمود
وبنفضل نكرر في السطر بتاعنا سطر على الوش وسطر على الظهر, لحين وصول القطعه للمقاس المطلوب ,او للطول المطلوب, بعد الوصول للطول المطلوب بنشتغل كمر صغير بنفس طريقه الكمر اللي عملناه في بدايه القطعه
الثلاث سطور اللي اشتغلناهم في بدايه القطعه
بعد ذلك بننتقل لمنطقه الظهر ,ونبدا في تنفيذ الحمالات
وطول الحماله ده يرجع لك انا بحب اشتغلها طويله شويه وبركب زرار بحيث ممكن اطولها او اقصرها
في اي وقت على حسب الطول المطلوب
بنركب في نهايه الحماله زرار وبنقفل الحماله ما بين الغرز
لتنفيذ الموديل لاي سن وباي مقاس يرجى الرجوع لصفحه جداول المقاسات
لمشاهده طريقه العمل عملي خطوه بخطوه تابعوا الفيديو التعليمي