جداول المقاسات

طريقة عمل فستان كروشيه صيفى بالتفصيل لكل الاعمار

بسم الله الرحمن الرحيم

 ازيكم يا حبايبي عاملين ايه 

موديل النهارده عباره عن فستان كروشيه صيفي سهل ومناسب للمبتدئين

 شرح طريقه عمل الفستان بالخطوات خطوه بخطوه 

الفستان مناسب للاطفال ومناسب كمان للكبار من خلال جداول المقاسات تقدري تنفذيه لاي سن وباي مقاس

 هنشتغلوا مع بعض بالتفصيل وهيكون في كمان فيديو تعليمي لطريقه العمل عملي

 خامات ومقاسات الفستان

 اشتغلت الموديل لسن من سنه لسنه ونص

 مع امكانيه تعديل المقاس بكل سهوله ليناسب اي سن واي مقاس

 نوع الخيط المستخدم اليزا امبير باتيك

 مقاس الابره 3 

كمية الخيط المستخدمه 250 جرام 

مواصفات الخيط خيط قطن صيفي تركي يوجد في الشله الواحده تدرجات لون واحد من الفاتح للغامق

 مع امكانيه استخدام اي نوع خيط مفضل لديكم وابره مناسبه لنوعيه الخيط 

طريقه اخذ المقاسات المطلوبه للفستان

•  اول مقاس بنحتاجه بيكون مقاس محيط دوران الراس

•  المقاس رقم 2 مقاس محيط دوران الذراع

•  المقاس رقم 3 محيط دوران الصدر 

• المقاس رقم اربعه الطول الكلي للفستان وده متروك لك

 جميع المقاسات موجوده في صفحه جداول المقاسات للحصول على جداول المقاسات اضغط على لينك الصفحه 

صفحه جداول المقاسات

 بدايه عمل الفستان 

بدايه الشغل بشتغل سلسله بمقاس محيط دوران الراس ناقص 5 سم 

بنراعي في السلسله ان تكون من مضاعفات العدد 8

 بشتغل القطعه بتاعتي لسن من سنه لسنه ونص مقاس محيط دوران الراس 45 سم

 طرحت 5 سم واشتغلت سلسله بطول 40 سم مع مراعاه ان تكون من مضاعفات العدد 8 

طلعت معي 96 غرزه وده مناسب لسن من سنه لسنه ونص

 طبعا اختلاف نوعيه الخيط واختلاف مقاس الابره هيكون عدد السلاسل مختلف

السطر الاول 

بدايه السطر بنعدل سلسله البدايه ونتاكد انها معدوله وبنروح على اول غرزه ونشتغل فيها منزلقه ونقفل السلسله برتفع ثلاث سلاسل وبعتبرهم باول عمود الغرزه رقم اثنين عمود الغرزه رقم ثلاثه عمود

 ثم سلسله اتخطى غرزه وانتقل للغرزه اللي بعدها واشتغل عمود الغرزه اللي بعدها عمود والغرزه اللي بعدها عمود

 ثم سلسله اتخطى غرزه ثم اشتغل ثلاثه عمود على ثلاث غرز واكمل على نفس النمط لنهايه السطر

وبينتهي السطر بتاعي بغرزه منزلقه في ثالث سلسله ارتفاع 

طريقه تقسيمه الصدر المربع

قبل البدء في السطر رقم 2 بنبدا نعمل تقسيمه الصدر 

 بنعد المجموعات اللي اتكونت عندنا 

كل مجموعه عباره عن ثلاث عواميد 

وبنبدا نقسم المجموعات اللي عندنا على منطقه الكم والامام والخلف 

بالنسبه للموديل الاساسي كان عندي 24 مجموعه كل مجموعه مكونه من ثلاثه عمود

 خصصت للكم اليمين خمس مجموعات والكم الشمال خمس مجموعات

 والامام سبع مجموعات والخلف سبع مجموعات

 وبدات احط العلامات في الفراغات علشان اعرف فين اماكن الزوايا 

السطر الثانى

بدايه السطر  بنتقل بمنزلقه للعمود رقم اثنين والعمود رقم ثلاثه واول فراغ يقابلني بدخل فيه بمنزلقه 

وببدا من الفراغ ارتفع  ثلاث سلاسل واعتبرهم باول عمود 

واشتغل في نفس الفراغ كمان اثنين عمود 

ثم سلسله وانتقل للفراغ التالي واشتغل ثلاثه عمود 

ثم سلسله انتقل للفراغ التالي واشتغل ثلاثه عمود

 واكمل على نفس النمط لحين الوصول للفراغ المخصص للزاويه وهو الفراغ اللي وضعنا فيه العلامه 

هشتغل في الفراغ ثلاثه عمود سلسلتين ثلاثه عمود 

ودي بتكون الزاويه وبحط العلامه تحت السلسلتين

 ثم بعد الزاويه بشتغل سلسله وبنتقل لاول فراغ يقابلني واشتغل فيه ثلاثه عمود 

سلسله وانتقل للفراغ اللي بعده واشتغل فيه ثلاثه عمود 

واكمل على نفس النمط لنهايه السطر وبينتهي السطر بتاعي بغرزه منزلقه في ثالث سلسله ارتفاع

 وبنستمر في تكرار السطر رقم 2 لحين وصول قطعه الصدر للمقاس المطلوب 

ما هي المقاسات المطلوبه للصدر المربع 

اول مقاس بنحتاجه بيكون مقاس محيط دوران الذراع 

بنقيس جزئيه الكم يجب ان تصل لمقاس محيط دوران الذراع 

ثاني مقاس بيكون مقاس محيط دوران الصدر

 وبنقيس الجزئيه المخصصه للامام او الجزئيه المخصصه للخلف 

يجب ان تصل لنص مقاس محيط دوران الصدر

 بعد التاكد من وصول القطعه للمقاس المطلوب بنبدا في تقفيل الكم

سطر التقفيل

 بنرتفع في بدايه السطر ثلاث سلاسل وبيحسبوا معايا باول عمود 

وفي نفس الفراغ بشتغل كمان اثنين عمود 

سلسله وبنتقل للفراغ التالي واشتغل ثلاثه عمود

سلسله وانتقل للفراغ واشتغل ثلاثه عمود 

لحين الوصول للزاويه 

بشتغل في فراغ الزاويه ثلاثه عمود فقط لان ده سطر التقفيل 

ثم سلسله واتخطى جزئيه الكم وانتقل للزاويه التاليه واشتغل في فراغ الزاويه ثلاثه عمود

 كده بنكون قفلنا اول كم

بعد ذلك بستمر على النمط بتاعي في كل فراغ ثلاثه عمود ثم سلسله وانتقل للفراغ التالي واشتغل ثلاثه عمود 

لحين الوصول للزاويه بشتغل في فراغ الزاويه ثلاثه عمود ثم سلسله وانتقل للزاويه التاليه واشتغل ثلاثه عمود

 وبكده بنكون قفلنا الكم الثاني

 بعد ذلك برجع للنمط بتاعي في كل فراغ ثلاثه عمود ثم سلسله وانتقل للفراغ التالي واشتغل ثلاثه عمود 

وبينتهي السطر بتاعي بمنزلقه في ثالث سلسله ارتفاع 

وبكده بنكون قفلنا السطر بعد ذلك بنشتغل سطرين او ثلاث سطور على حسب مقاس الفستان لحين الوصول لمنطقه الوسط

 نمط السطور بتاعتنا بتكون عباره عن بدايه السطر برتفاع الثلاث سلاسل وبعتبرهم بعمود 

وفي الفراغ بشتغل كمان اثنين عمود

 سلسله وبنتقل للفراغ التالي وبشتغل ثلاثه عمود 

سلسله وانتقل للفراغ التالي واشتغل ثلاثه عمود 

وبينتهي السطر بتاعي بمنزلقه في ثالث سلسله ارتفاع 

وبكرر السطر ده اي عدد من المرات لحين الوصول لمنطقه الوسط

 بعد الوصول لمنطقه الوسط بنبدا في تغيير الغرزه حتى نتمكن من تكمله الفستان 

طريقه عمل النصف الثاني للفستان

 بدايه السطر الاول

 ببدا من قلب اول فراغ برتفع ثلاث سلاسل وبعتبرهم بعمود 

وفي نفس الفراغ بشتغل كمان اثنين عمود

 ثم سلسله وانتقل للفراغ التالي واشتغل فيه صدفه من اثنين عمود سلسله عمود 

ثم سلسله انتقل للفراغ اللي بعده واشتغل فيه ثلاثه عمود 

ثم سلسله انتقل للفراغ واشتغل صدفه من اثنين عمود سلسله عمود 

وبستمر على نفس النمط لنهايه السطر

وبينتهي السطر بتاعي في ثالث سلسله ارتفاع

 السطر الثانى

 بمشي بمنزلقه للوصول لاول فراغ 

برتفع ثلاث سلاسل وبعتبرهم بعمود وفي نفس الفراغ بشتغل كمان عمود 

ثم سلسله وانتقل للصدفه المكونه من اثنين عمود سلسله عمود 

واشتغل صدفه جديده من اتنين عمود سلسلة عمود 

ثم سلسله وانتقل للفراغ واشتغل اثنين عمود

 ثم سلسله وانتقل للفراغ واشتغل اثنين عمود 

ثم سلسله وانتقل للصدفه المكونه من اثنين عمود سلسله عمود اشتغل تحت السلسله صدفه جديده

 من اثنين عمود سلسله عمود

 وبكمل على نفس النمط لنهايه السطر وبينتهي السطر بتاعي بمنزلقة في ثالث سلسله ارتفاع

 وبنستمر في تكرار السطر رقم 2 لحين وصول الفستان للطول المطلوب

 طول الفستان متروك لك بعد وصول الفستان لطول المطلوب بنبدا في تشطيب فتحه الرقبه

 طريقه تشطيب فتحه الرقبه

 بوصل الخيط في اي غرزه من غرز فتحه الرقبه 

برتفع سلسله وبتكون مجرد ارتفاع وبشتغل في اول غرزه غرزه حشو

 الغرزه رقم اثنين غرزه حشو

 الغرزه رقم 3 غرزه حشو

 ثم ارتفع سلسلتين وارجع لغرزه الحشو اللي ارتفعت منها ادخل فيها واعمل منزلقه 

كده بنكون كونا غرزه البيكو

 بعد ذلك بشتغل ثلاث غرز حشو على ثلاث غرز

 ثم ارتفع سلسلتين وارجع لغرزه الحشو واشتغل منزلقه 

ثم ثلاثه حشو على ثلاث غرز

 وارتفاع سلسلتين وارجع لغرزه الحشو واعمل منزلقه

 واكمل على نفس النمط لنهايه السطر

 وبينتهي السطر بتاعي بغرزه منزلقه في اول غرزه حشو

 وبكده بنكون شطبنا فتحه الرقبه 

تقدري تشتغلي بنفس الغرزه على فتحه الكم 

بعد ذلك من الممكن اعمل حزام من شريط الستان او الاستغناء عنه

وبكده بنكون اشتغلنا مع بعض الفستان خطوه بخطوه وحددنا المقاسات المطلوبه

 حتى تتمكنوا من تنفيذ الموديل لاي سن وباي مقاس 

لا تترددوا في ترك اي سؤال او استفسار وسوف اقوم بالرد على الاسئله مباشره

لمشاهده الطريقه عملي تابع الفيديو التعليمي