طريقة عمل فستان كروشيه صيفى بالباترون
بسم الله الرحمن الرحيم ازيكم يا حبايبي عاملين ايه
موديل النهارده عباره عن فستان كروشيه صيفي مناسب جدا للاطفال ومناسب كمان للكبار
يعني تقدري تنفذيه لاي سن وباي مقاس
طريقه اخذ المقاسات مختلفه عن الطريقه المعتاده وده اللي هنشوفه دلوقتي هيكون في فيديو تعليمي لطريقه العمل بالتفصيل وكمان شرح لكل قطعه ومقاسات كل قطعه لجميع الاعمار
كمان هيكون موجود جدول المقاسات علشان تقدري تنفذي الموديل لاي سن وباي مقاس
مواصفات الموديل
تم تنفيذ الموديل لسن سنه ونص مع امكانيه تعديل المقاس ليناسب اي سن واي مقاس
نوع الخيط المستخدم خيط ستوك تركي
مقاس الابره 3
كميه الخيط 200 جرام تقريبا
من الممكن استبدال نوعيه الخيط باي نوع مفضل لديكم وابره مناسبه لنوعيه الخيط
المقاسات المطلوبه للموديل
- مقاس طول الصدر
- طول حرده الكم
- محيط دوران الصدر
- الطول الكلي للفستان
بدايه العمل
بنبدا بسلسله بدايه بمقاس طول الصدر ناقص طول حرده الكم
القطعه اللي هنشتغل عليها المفروض تكون من عند منطقه الوسط لحرده الكم
لو هتشتغلي من جدول المقاسات هتحتاجي مقاسين
اول مقاس بيكون طول الصدر بالكامل بنطرح منه طول حرده الكم
الناتج اللي هيطلع هو ده هيكون طول سلسله البدايه
هنراعي فى سلسله البدايه انها تكون بمضاعفات العدد اربعه زائد واحد
دلوقتي هنشوف مقاسات القطعه بتاعتنا المناسبه لكل الاعمار لسهوله العمل
طول سلسله البدايه المناسبه
- من شهر لثلاث شهور 9 سم
- من ثلاث شهور لست شهور 10 سم
- من من ست شهور لسنه 11 سم
- لسن من سنه ونص لسنتين 12 سم
- لسن ثلاث سنين 13 سم
- لسن اربع سنين 16 سم
- لسن خمس سنين 17 سم
- لسن ست سنين 17 سم ونص
- لسن سبع سنين 18 سم
- لسن ثمان سنوات 18 سم ونص
- لسن تسع سنين 20 سم
- لسن 10 سنين 20 سم ونص
- لسن 11 سنه 22 سم
- لسن 12 سنه 22 سم ونص
ودي المقاسات المناسبه للقطعه بتاعتنا طول سلسله البدايه
هنراعي في سلسله تكون مضاعفات العدد اربعه زائد واحد
بشتغل القطعه بتاعتي لسن سنه ونص الطول المناسب هو 12 سم
اشتغلت سلسله البدايه بطول 12 سم ورعيت فيها ان تكون من مضاعفات العدد اربعه طلعت معايا 24 غرزه زودت غرزه واحده اصبحت سلسله البدايه 25 غرزه وده مناسب لسن سنه ونص
بدايه العمل برتفع ثلاث سلاسل وبعتبرهم باول عمود
وبشتغل على كل غرزه تقابلني غرزه عمود لنهايه السطر
السطر رقم 2 برتفع سلسله وبعتبرها مجرد ارتفاع وبشتغل على كل غرزه تقابلني غرزه حشو لنهاية السطر
السطر واحد واثنين مجرد تاسيس
بدايه النمط
سطر رقم واحد في النمط بتاعنا
بنرتفع ثلاث سلاسل وبنعتبرهم باول عمود وبنزل على سطر العواميد اتخطى اول عمود وثاني عمود واروح للعمود رقم ثلاثه اشتغل فيه ثلاثه عمود امامي
بعد ذلك انتقل لسطر غرز الحشو واتخطى ثلاث غرز حشو واروح للغرزه الرابعه واشتغل عمود
ثم انزل لسطر العواميد اتخطى ثلاثه عمود وفي العمود الرابع بشتغل ثلاثه عمود امامي
ثم انتقل لسطر غرز الحشو اتخطى ثلاث غرز حشو واشتغل في الغرزه الرابعه غرزه عمود
وبستمر على نفس النمط لنهايه السطر وبينتهى السطر بتاعي بعمود في اخر غرزه حشو
السطر رقم 2
من سطور النمط برتفع سلسله وبتكون مجرد ارتفاع وبشتغل على كل غرزه تقابلني غرزه حشو
السطر رقم ثلاثه من سطور النمط
برتفع ثلاث سلاسل وبعتبرهم بعمود وبشتغل في نفس الغرزه كمان عمود
اتخطى غرزه وانتقل للغرزه اللي بعدها واشتغل عمود
ثم انزل لسطر العواميد واشتغل فيه العمود ثلاثه عمود امامي
ثم انتقل لسطر غرز الحشو اتخطى ثلاث غرز حشو واشتغل في الغرزه الرابعه عمود
ثم انزل لسطر العواميد واشتغل في العمود بلفه ثلاثه عمود امامي
واكمل على نفس النمط لنهايه السطر وبينتهي السطر بتاعي باثنين عمود في اخر غرزه حشو
السطر رقم اربعه من سطور النمط
برتفع سلسله وبتكون مجرد ارتفاع وبشتغل على كل غرزه تقابلني غرزه حشو لنهايه السطر
هنفضل نشتغل ونكرر في اربع سطور النمط لغايه ما توصل القطعه بتاعتنا للطول المطلوب
وهو طول محيط دوران الصدر على حسب السن والمقاس
بعد وصول القطعة بتاعتنا لمقاس محيط دوران الصدر بنبدا في تشطيب القطعه وعمل مرد الزراير والعراوي
وده مشروح بالتفصيل في الفيديو التعليمي
بعد الوصول بطول الفستان للطول المطلوب بنشتغل كمر في نهايه الفستان بنفس غرزه الصدفه
للوصول لصفحه جداول المقاسات ده لينك صفحه الجداول
حتى تتمكنوا من تنفيذ الموديل لاي سن وباي مقاس